Nemendur á 3.ári í Hestafræðideild leggja á skeið og mæla mjólkursýru | Háskólinn á Hólum

Nemendur á 3.ári í Hestafræðideild leggja á skeið og mæla mjólkursýru

Í vikunni í blíðskaparveðri í Hjaltadalnum voru nemendur á þriðja ári í Hestafræðideild að æfa sig að taka skeiðhesta Hólaskóla til kostanna. Blóðsýni voru tekin úr hestunum til að mæla mjólkursýru og fá þannig ákveðið mat á líkamlega álagið á skeiðinu. Hestarnir voru einnig með púlsmæla og GPS var notað til að mæla hraðann á skeiðinu. Nemendur kynnast þessum mælitækjum við þjálfun á skeiðhestunum meðal annars til að fá hlutlægt mat á líkamlega álagið. 
 
Það er þekkt samkvæmt rannsóknum að á afkastamiklu skeiði nota íslenskir hestar umtalsverð loftfirrð efnaskipti og þá hleðst upp mjólkursýra í blóði. Við mælinguna nægir að taka lítið blóðsýni (um 2 ml) úr hálsæð og blóðdropi er settur á mælistrimil sem er stungið í lítinn mæli (Lactate Pro 2) sem telur niður 15 sekúndur og gefur upp mjólkursýrumagnið. Mjólkursýran var mæld eftir síðasta sprett hjá hverjum hesti (af 2 eða 3 sprettum sem áttu að vera um 100 m hver) og kom í ljós að magnið var mjög mismunandi eftir hestum, en magnið verður ekki umtalsvert nema hesturinn skeiði af krafti. Það var Höskuldur Jensson dýralæknir sem tók blóðsýnin og Guðrún Stefánsdóttir kennari var honum og nemendum til aðstoðar við mjólkursýrumælingarnar. Það er Þorsteinn Björnsson reiðkennari sem er umsjónarmaður skeiðkennslunnar. Að þessu sinni voru nemendur í sjálfstæðri vinnu og sáust margir góðir skeiðsprettir og umtalsverð mjólkursýrumyndun. Meðaltalsgildi mjólkursýru var 8,6 mmól/L hjá öllum hestunum og hæsta gildið sem sást var 18,8 mmól/L.
 
Þú ert að nota: brimir.rhi.hi.is