Námskeið í trjáfellingu og grisjun

Við vekjum athygli á námskeiði í trjáfellingu og grisjun með keðjusög. Námskeiðið verður haldið dagana 28. - 30. apríl hér heima á Hólum og að því stendur endurmenntunardeild Landbúnaðarháskóla Íslands, í samvinnu við Hóladeild Skógræktarfélags Skagafjarðar.

Í lýsingu á námskeiðinu á vef endurmenntunardeildarinnar segir m.a.: „Námskeiðið er öllum opið. Það hentar þeim sem ekkert kunna á keðjusagir og vilja læra á þær. Einnig þeim sem hafa notað keðjusagir en vilja bæta fellingartækni sína eða vilja öðlast meiri þekkingu á meðferð og umhirðu saga. Hámarksfjöldi þátttakenda er 10.

Námskeiðið er bæði bóklegt og verklegt. Fyrsti dagur er bóklegur þar sem meðal annars er farið yfir fellingartækni, öryggisatriði við fellingu trjáa og líkamsbeitingu. Leyfi og öryggissjónarmið varðandi fellingu trjáa í þéttbýli. Einnig verður fjallað um val á trjám til fellinga og komið inná grisjun skóglenda, trjáþyrpinga og garða. Á öðrum degi fá nemendur að kynnast innviðum keðjusagarinnar með því að taka þær í sundur. Komið verður inná hvernig framkvæma eigi einfalda bilanaleit í söginni, ásamt því að læra hefðbundið viðhald, þrif sagar og brýningu keðju. Loks verður einn og hálfur dagur í trjáfellingum og grisjun í skógi, þar sem lögð verður áhersla á rétta fellingartækni og uppröðun viðarins.“
 
Námskeiðið er alls 28 kennslustundir og námskeiðsgjald er kr. 48.500. Opið er fyrir skráningar til 17. apríl, á vef endurmenntunardeildar LbhÍ. 
 
Myndin var tekin á sambærilegu námskeiði í Hólaskóginum, í lok apríl 2015.
 
Trjáfelling í apríl 2015

 

Þú ert að nota: brimir.rhi.hi.is