Gestakennsla kennara Ferðamáladeildar í Háskólanum í Suðaustur-Noregi í Bø

Líklega er mörgum kunnugt um að Guðrún Helgadóttir prófessor við Ferðamáladeild Háskólans á Hólum gegnir einnig prófessorsstöðu í ferðamálafræði við Háskólann í Suðaustur-Noregi, (University College of Southeast Norway). Háskólinn er í bænum Bø i Telemark, um 150 km frá Osló. Eitt af námskeiðunum sem Guðrún kennir þetta vorið heitir Nature, Culture and Guiding og fékk hún samstarfsfólk sitt á Hólum til að taka þátt í því með sér. 
 
Anna Vilborg Einarsdóttir lektor við Ferðamáladeild, sem nýverið lauk rannsókn á hlutverki leiðsögumanna og framlagi þeirra til náttúruverndar, var á leið til Svalbarða í Noregi í lok febrúar í ákveðnum erindagjörðum. Hún sló tvær flugur í einu höggi og hóf Noregsferðina á því að koma við í Bø og halda fyrirlestur um rannsóknina fyrir nemendur Guðrúnar. 
 
Stuttu seinna var Laufey Haraldsdóttir, lektor og deildarstjóri með fyrirlestur í námskeiði Guðrúnar, þar sem hún fjallaði um landnotkun, náttúruvernd, virkjanir og ferðamennsku. Þá var tæknin nýtt því Laufey tók upp fyrirlesturinn á skrifstofu sinni á Hólum og sendi til Noregs. 
 
AVE.
Ef smellt er á myndirnar, fæst stærri útgáfa.
 
 
Þú ert að nota: brimir.rhi.hi.is